ওগু ভালা নায়, তে হগু ভালা নায়

ওগু ভালা নায়, তে হগু ভালা নায়,
ইতা ভালা নায়, তে হিতা ভালা নায়।
নারে নারে নারে নারে
মুই ভালা নায় তাই জগত ভালা নায়।।

অচিনপুরী কওছাইন তোমার ছউক ভালা নি,
মাইনষর ভালা দেখিয়া গতরো জ্বালা ধরে নি?
তুমি দেখি বাউগোর (হিসেবী) কানা,
অউ দেখো তে হউ দেখো না,
কোনু সময় ছউক খোলো না
মজা পাইলে ছউক মুজো (বুজো) না।
ছউকর ব্যবহার ভুলিয়া, আথারে পাথারে চাইয়া-
শেষ বিচারে গিয়া তুমি পার পাইতায় নায়।।

অচিনপুরী কওছাইন তোমার মুখ ভালা নি,
তোমার মাত (কথা) হুইন্যা মাইনষর জ্বালা জুড়ায় নি?
মাতর মাঝে খুব সিয়ানা
হাছা মিছা বুজা যায় না,
কোনু সময় মুখো তালা
কোন সময় কান ঝালাপালা,
মুখর ব্যবহার ভুলিয়া, জিফরার লাগাম না ধরিয়া,
শেষ বিচারে গিয়া তুমি পার পাইতায় নায়।।

অচিনপুরী কওছাইন তোমার মন ভালা নি,
মনর মাঝে রাজা উজির মারি ফালাও নি?
মনর মাঝে সাপর প্যাছ।
সুযোগ পাইলে মারো ন্যাছ (ছোবল),
মনর মাঝে চোরাবালি
সরল অংকে জোড়াতালি,
সহজ মানুষ না হইয়া, মনর ময়লা না মুছিয়া,
শেষ বিচারে গিয়া তুমি পার পাইতায় নায়।।